Papatoi Limited Tūrama: Whakahou, whakaora, whakamana - Ngā Wai o Horotiu

Credits
  • Pou Auaha / Creative Director
    Ataahua Papa (Ngāti Koroki Kahukura; Ngāti Mahuta)
  • Ringatoi Matua / Design Director
    Ataahua Papa (Ngāti Korokī Kahukura, Ngāti Mahuta), Graham Tipene (Ngāti Whātua Ōrākei, Ngāti Kahu, Ngāti Hine, Ngāti Hauā, Ngāti Manu), Phil Wihongi (Ngāti Hine, Ngāpuhi), Angus Muir
  • Ngā Kaimahi / Team Member
    Warren Pene (Ngāti Kahungunu), Barbara Holloway, Rose Jackson, Eric Ngan, Rob Jones, Elliot Munford, Hannah Walker, Marc Logan, Dan Green, Luke Romanos, Jarrod Barrow
  • Kaitautoko / Contributor
    Heart of the City
  • Client
    Te Kaunihera o Tāmaki Makaurau | Auckland Council
Description:

I te pō tiwhatiwha
ka pakaru mai te hinātore o te ao mārama.
Ka whai ko Ātea, ko Kiko me Māramatanga
E tiaho mai ai te whānuitanga o te māramatanga,
ki ngā koiora katoa o te ao tūroa

TŪRAMA
Whakahou, whakaora, whakamana
Ngā Wai o Horotiu

Kua ngaro a Horotiu i te tirohanga kanohi.

Heoi, e kore e wareware. He wā tōna ka kitea anō.

He whakakitenga a Tūrama nō te mana me te mauri o te takiwā me te ātea, nō ngā āhuatanga i ngaro rā i te whakatūnga o ngā tāone o tauiwi e tū ai ko Tāmaki Makaurau.

Ka arahina te hunga tirotiro i ngā toi rama kua whakatūria i tētehi ara, i te takutai taketake ki te hōro o te tāone. E tū ana ngā mahi toi a ngā mātanga toi Māori i te taha o ētehi mahi toi hou, ā-rama, ā-kiko, ā-oro hei whakaoho i te ao kikokiko me te ao wairua i aua wāhi rā, hei whakaara anō hoki i ētehi kōrero hōhonu, i ētehi kōrero whānui e pā ana ki te ātea me te takiwā.

Ka whakatauria te manuwhiri e Tangaroa rāua ko Tāne Mahuta i te waharoa ki ō rāua takiwā i Te Wehenga, e tūhono ana i te wāhi i tūtaki ai rāua i ngā wā o uki, i te takutai taketake, i te komititanga o te wai māori me te waitai. E whakamaumahara mai ana ngā momo manu me ā rātou tangi i a tātou ki te wā i makuru ai te riu nei, i nui ai hoki ōna hua, me ōna āhua i takea mai rā i te kupu whakarite e whakapuakina tonuhia nei i ngā tauparapara me ngā whaikōrero, e hono ana i ngā mea katoa ki te wāhi me tōna hiranga ukiuki. Tū ana a Horotiu hei tohu i te mauri o Ngā Wai o Horotiu, hei maharatanga anō ki ngā tūpuna i hahua ai ō rātou iwi i tēnei wāhi e wātea ai te wāhi nei hei tūnga mō te hōro o te tāone.

E tohu ana a Tūrama i te hiranga o te whakaū kia puta he māramatanga i ngā kōrero e whakawhitihia ai i waenga i a tātou ki ngā rerekētanga me te kanorau, e pai ai tā tātou whakanui i ngā āhuatanga e rite ana, e wātea ana anō hoki ki a tātou katoa.

He mea hoahoa, he mea waihanga hoki a Tūrama hei whakanui i te mānawatanga ā-motutanga o Matariki, i runga anō i te whakaaro he wā tōna ka nekehia ki kaupapa Māori kē atu, ā, ka tiaho mai tōna māramatanga ki tēnei wāhi hei tohu anō i tō tātou nekehanga i te ingoa o Auckland ki a Tāmaki Makaurau, ki te wāhi i hiahiatia ai e te tini.

Anei a Tūrama, e rāhiri nei i ngā tāngata katoa kei Tāmaki Makaurau, kei tua atu rānei, kia hoki mai, kia maumahara, kia whakaaro hou, kia whakahou hoki i te mauri o ngā wai o te riu o Ngā Wai o Horotiu.